Nga: Klementin Mile
Prej kohësh flitet për Vettingun si mekanizmi kryesor për pastrimin e sistemit të drejtësisë, si garancia më e rëndësishme e drejtësisë së re. Në fakt, Vettingu, si mekanizëm për rivlerësimin e gjyqtarëve dhe prokurorëve, është konceptuar si ajo vrima biblike e gjilpërës, ku duhet të jetë e pamundur të kalojnë të korruptuarit dhe të paaftët.
Por Vettingu nuk është instrument hyjnor. Ai është njerëzor, tepër njerëzor. Si i tillë, Vettingu është padyshim i gabueshëm dhe, në fakt, mund të bëjë që njerëzit të cilët do t’i shërbejnë drejtësisë së re, të jenë ose më të mirë se këta të sotmit, ose më të këqij. Engjëj apo djaj, këtë nuk mund ta dimë me siguri. Ç’ka mund të dimë është vetëm që e nesërmja e drejtësisë shqiptare do të jetë e ndryshme nga e sotmja.
Pasiguria për të nesërmen i justifikon të gjitha bastet. Opozita, për shembull, prej kohësh ka vënë bast se drejtësia e nesërme do të jetë edhe më e keqe se kjo e sotmja, pasi do të jetë në duart e një njeriu të vetëm, kryeministrit të vendit. Sipas opozitës, ky i fundit po ia del të vendosë njerëzit e tij në sistemin e ri të drejtësisë, me anë të të cilit pastaj do arrijë të kontrollojë opozitën dhe do të garantojë pandëshkueshmërinë e vet.
Është e vështirë të thuhet nëse ka apo jo të drejtë opozita në akuzat e saj. Por ajo që kuptohet lehtë është se akuza të tilla, duke qenë se vijnë nga njerëz që fundja e kanë provuar shijen e pushtetit, kanë patur në dorë para publike dhe janë përfolur për korrupsion, nuk përbëjnë argument vendimtar. Në sytë e publikut asnjanës, këto akuza rëndojnë më shumë opozitën sesa Vettingun.
Vettingu dëmtohet më tepër kur mbrohet nga eksponentë të mazhorancës. Njerëz që sot kanë në dorë qeverisjen e vendit, paranë publike, tenderat, koncesionet, PPP-të, lejet e ndërtimit, institucionet liçensuese dhe çertifikuese, vendet e punës në administratën qendrore dhe vendore, dalin dhe deklarojnë se mezi presin përfundimin e Vettingut, ngritjen e SPAK-ut dhe BKH-së dhe dhënien fund pandëshkueshmërisë.
Ta mbrosh Vettingun në këtë mënyrë në një vend ku buxheti i shtetit shpërdorohet në përqindje të frikshme, dhe ku të gjitha raportet monitoruese ndërkombëtare tregojnë rritje korrupsioni dhe aktiviteti kriminal, kjo është vërtet një goditje e rëndë për Vettingun dhe Reformën në Drejtësi.
Drejtësia, që të funksionojë si duhet, e ka të nevojshme jo vetëm të respektojë parimet e saj të brendshme, por edhe të tregohet relevante për vlerat dhe interesat e shoqërisë ku operon. Drejtësisë i nevojitet besimi i shoqërisë. Besimi se drejtësia do të jetë vërtetë e drejtë, e paanshme, e ndershme dhe profesionale. Pikërisht këtë besim po e godasin sot shumë herë më tepër ata që e mbrojnë drejtësinë, sesa ata që e sulmojnë atë. Dhjetë sulme mbi Vettingun nga Gazmend Bardhit nuk janë asgjë në krahasim me një mbrojtje nga Taulant Balla./Gazeta Liberale
