Gjatë mbledhjes së grupit parlamentar ka pasur një përplasje mes kryeministrit Rama dhe ish-ministrit të Brendshëm, Saimir Tahirit.
Teksa ka folur për numrin e punonjësve të Vettingut, kryeministri Rama ka thënë se nuk do të lejojë asnjë tejkalim dhe abuzim, ndërsa siguroi se qeveria nuk të kursejë asnjë burim për numrin e nevojshëm të këtyre punonjësve.
“Më vjen keq që është hapur një debat për Vettingun, ky debat lidh vettingun me numrin e punonjësve. Ne e dimë shumë mirë se nuk është çështje numri punonjësish, por është çështje ristrukturimi, ne nuk do të kursejmë asnjë burim që qeveria ka, por do bëjmë gjithçka që është e nevojshme, ama asnjë tejkalim i kotë dhe abuziv nuk mund të pranohet. Të enjten jemi të gatshëm të japim të gjitha përgjigjet e nevojshme, ia vlen t’i paralajmërojmë kolegët tanë sepse rrezikojnë të dalin qesharakë përballë argumenteve që do përballen ditën e enjte.
Asnjë institucion të mos bjerë në formën e tepsisë për të akomoduar njerëz, nuk them se ky është rasti, por në rastin konkret është respektuar principi i reformës dhe të gjithë duhet ta dinë që pagat në këtë institucion janë ekstra”, ka thënë kryeministri Rama.
Ndërkohë, pas kësaj deklarate ka ndërhyrë ish-ministri i Brendshëm Saimir Tahiri, i cili është shprehur kundër, duke kërkuar që numri i punonjësve të mos reduktohet në mënyrë që më pas të mos ketë justifikime nëse nuk kryhet detyra e ngarkuar ashtu siç duhet lidhur me çështjen e Vettingut.
Tahiri: Neve nuk na shërben qasja e kontabilisti dhe as nuk duhet parë për çështjen e Vettingut. Kemi marrë një zotim dhe duhet ta çojmë deri në fund. E them këtë sepse dy institucionet aty thanë që ne nuk bëjmë dot detyrën me këtë buxhet. Po nesër ça do na thonë? Mbase duhet parë me pak fleksibilitet, ne duhet t’i heqim çdo justifikim atyre njerëzve që do na thonë s’e bëmë detyrën sepse ju nuk na dhatë lekët. Të paktën nga ana e mbështetjes buxhetore të kemi mundësi të kërkojmë llogari për atë që bëjmë.
Ndërhyn ministri Ahmetaj: Dakord me Tahirin në këtë logjikë, e ftoj të ulet me mua që të shohë se ne i kemi dhënë mbështetjen maksimale strukturës, struktura është e plotë./ Tirana Today
