Gjyqtari pranë Apelit për Krimet e Rënda Tiranë, Gurali Brahimllari është shkarkuar nga detyra. Vendimi është marrë nga Komisioni i Pavarur i Kualifikimit.
Gjatë seancës dëgjimore Brahimllarit iu vunë në dukje disa probleme të pasurisë kryesisht mbi mosdokumentimin e plotë të të ardhurave të bashkëshortes, mungesë të burimeve të ligjshme për blerjen e disa pasurive të patundshme dhe mospërputhje në deklarime.
Komisioni po ashtu gjeti se Brahimllari nuk kishte pasur mundësi të shlyente huatë e marra me të ardhura të ligjshme dhe rezultoi me mungesë burimesh financiare për një sërë vitesh. Ai u vendos në vështirësi nga Vetting-u për një hua të marrë nga kunati i tij që jeton në Greqi.
Gjyqtari justifikoi duke thënë se kunati është emigrant prej 25 vitesh, dhe kishte mundësi financiare. Ndërsa, sa i përket blerjes së shtëpisë, ai tregoi se kishte kontribuar edhe bashkëshortja, e cila është stomatologe.
