Çdo ditë e më tepër mediat raportojnë raste të shqiptarëve, të cilët vetëvriten. Në gjendje të rënduar psikologjike të rinj, burra, gra e të moshuar i dorëzohen aktit të vetëflijimit. Për shkaqe të ndryshme, herë një lidhje sentimentale e dështuar, herë të tjera depresion, arsyet përse shumë njerëz zgjedhin të vetëvriten janë nga më të ndryshmet.
Në Shqipëri, numri i njerëzve të cilët i japin fundit jetës së tyre, janë në nivele të larta. Sipas të dhënave të INSTAT, vetëm në vitin 2017 numri i personave të vetëvrarë ka qenë 197, ndërkohë numri i vrasjeve ka qenë 50.
Në një intervistë për Tirana Today, sociologu Gëzim Tushi thotë se peshën më të madhe e kanë prindërit dhe se ata duhet të jenë më të kujdesshëm me fëmijët e tyre.
“Është rruga më e shkurtër që njeriu gjen për të ndaluar hallet e jetës. Janë të shumta shkaqet përse shqiptarët kryejnë vetëvrasje. Shumë të rinj largohen nga kjo jetë për arsye erotike, kanë humbur të dashurin e tyre. Një tjetër fenomen i shtuar së fundmi është edhe bulizmi. Janë edhe ata njerëz që jetojnë në varfëri, të cilët nuk e përballojnë dot më. Shtuar ata që kanë vese si alkooli, droga apo lojërave të fatit.
Por, përtej shkaqeve, e rëndësishme është se çfarë duhet të bëjmë. Mbrojtja e njeriut nga vetëvrasjet duhet bërë në familje, aty ku jeton ai person. Por, problemi qëndron se ne nuk kemi ndonjë shoqëri, ku prindërit të jenë të përgatitur për të prindëruar edhe në këto aspekte psikologjike. Prindërit i çmendin fëmijët, duke i kërkuar që ata të jenë gjeni, i kërkojnë të jenë të talentuar në çdo fushë.”
Në një kohë kur jeta është bërë shumë herë më dinamike, njerëzit janë bërë më individualist, vetëvrasjet janë veçse një rast më tepër në mediat shqiptare. Sipas Tushit, vetëvrasja nuk është vetëm një plagë për të afërmit e viktimës, por ajo ka edhe pasoja ekonomike e sociale.
“Një prind, një mësues, një punonjës social, një fqinj i mirë është në gjendje të dallojë në horizontin e vetëvrasjes, shfaqjen e simptomave që mund ta çojnë një individ drejt vetëvrasjes.
Në vendet evropiane, niveli i vetëvrasjeve në zonat urbane është më i lartë se në ato rurale. Tek ne në Shqipëri, është në nivele të njëjta. Nuk ka një diferencë të theksuar midis qyteteve apo fshatrave, sa i takon numrit të vetëvrasjeve.
Veç të tjerave, vetëvrasja ka dhe pasoja ekonomike e sociale. Janë të shumta rastet kur vetëvritet kryefamiljari dhe kjo në sociologji quhet vetëvrasje egosite. Ti vret veten ngaqë nuk zgjidh dot hallet që të kanë zënë, kjo është rruga e gabuar. Në vend që të angazhosh forcat për tu përballur me hallin që të ka zënë, për ta zgjidhur atë, shkon e gjen rrugën më të shkurtër.
Turbullira që shkaktohet pas vetëvrasjes është akoma më e thellë sesa humbja e jetës së atij që u vetëvra,”-përfundon Tushi.
Ndërkohë psikologët bëjnë thirrje që njerëzit të jenë më të kujdesshëm, veçanërisht gjatë sezonit të verës. Kjo sepse, sipas tyre gjatë kësaj stine, shtohen rastet e personave që kanë tendencë t’i japin fund jetës me mënyra të ndryshme. TIRANA TODAY
