Vetëvendosje thirrje Thaçit: Nxirr letrën e mandatimit të LDK-së

Zyrtarët e Vetëvendosjes i bëjnë thirrje presidentit Thaçi dhe kreut të LDK-së, Isa Mustafës, që të publikojnë letrën ku LDK-ja mandatohet për krijimin e ekzekutivit të ri.

Përmes një postimi në Facebook, ministrja në detyrë e Drejtësisë, Albulena Haxhiu thotë se zyra e presidentit e konfirmoi këtë lëvizje që javën e kaluar, por shkresa ende nuk është bërë publike në media.

“Jemi të gjithë dëshmitarë, e sidomos vetë gazetarët, se letrat dhe shkresat për këto tema drejtuar VV-së dhe Kryeministrit Kurti, më parë dilnin në media sesa të mbërrinin në zyrat tona. Çfarë po ndodh tani? Pse nuk e publikojnë këtë shkresë? Pse ky terr informativ? Pse kjo mungesë absolute e transparencës. Padyshim që ata janë të vetëdijshëm për arbitraritetin e tyre dhe se kjo është shkelje e qëllimshme e Kushtetutës”, shkruan ajo.

Presidenca e konfirmoi gjatë javës që shkoi takimin e mbajtur mes Thaçit dhe Mustafës, e bëri të ditur se gjatë tij, kreu i shtetit i dorëzoi udhëheqësit të LDK-së një letër ku i kërkon propozimin e të mandatuarit të mundshëm për formimin e Qeverisë së re të Republikës së Kosovës, e cila duhet të jetë e “qëndrueshme dhe gjithëpërfshirëse”.