Presidenti Ilir Meta ka bërë sërish thirrje për vetëpërmbajte ditën e nesërme, teksa i fton qytetarët që të sillen me qetësi dhe mençuri.
Meta e konsideron të rëndësishme ruajtjen e qetësisë në 30 qershor. Sipas tij, të gjithë duhet t’i shërbejmë të ardhmes evropiane të Shqipërisë, ndaj bën apel që të shmangen provokimet që mund të çojnë në dhunë.
Postimi i plotë:
Të dashur qytetarë,
Përsëris thirrjen time për të respektuar në mënyrë civile dhe demokratike vendimin e gjithsecilit gjatë ditës së nesërme.
Sërish ju ftoj të gjithëve të silleni me qetësi dhe mençuri!
Është shumë e rëndësishme vetëpërmbajtja e gjithsecilit!
E theksoj edhe njëherë rëndësinë e jashtëzakonshme që ka nesër ruajtja e paqes sociale.
Të gjithë duhet t’i shërbejmë asaj dhe së ardhmes evropiane të Shqipërisë.
Shmangni provokimet që mund t’ju çojnë drejt dhunës, në mënyrë që dallimet politike të mos cenojnë bashkëjetesën qytetare në çdo familje, në çdo lagje, në çdo fshat, në çdo qytet dhe në të gjithë shoqërinë tonë.
