Adhurim Krasniqi, i cili dyshohet se tentoi të ekzekutonte disa ditë më parë menaxherin e Vip-ave në Kosovë, Met Elshani, ka arritur që të arratiset nga Qendra Spitalore Universitare e Kosovës në Prishtinë.
Krasniqi ishte në masën e arrestit me paraburgim, por arriti që t’ia mbathë, edhe pse te dera kishte disa gardianë që e mbanin në mbikëqyrje.
Të gjitha dyshimet e arratisjes së A. Krasniqit, lidhen me mundësinë e vënies në gjumë të gardianëve, të cilëve u është shërbyer një pije.
Deri më tani, nga hetimet është mësuar se dy gardianëve është shërbyer kafe nga një person gjatë mbrëmjes, i cili ka sjellë kafe për pacientët brenda dhomës ku po qëndronte i paraburgosuri, por dhe për policët që po bënin roje. Kafe kjo që më pas i ka vënë në gjumë të gjithë ata që e kanë konsumuar.
I paraburgosuri është arratisur nga klinika e Ortopedisë në QKUK, në orët e para të mëngjesit të ditës së premte.
