Një sasi tritoli është gjetur pranë një banesë në periferi të Fushë Krujës.
Fatmirësisht lënda plasëse nuk ka shpërthyer, pasi e zonja e shtëpisë e ka vënë re dhe ka njoftuar autoritetet përkatëse.
Forcat xheniere kanë arritur menjëherë në vendngjarje dhe kanë bërë të mundur shpërthimin e kontrolluar të lëndës plasëse.
Bëhet me dije se banesa e targetuar ishte e një adoleshenteje të shfrytëzuar seksualisht, për rastin e të cilës u finalizua edhe një operacion pak ditë më parë. Për rastin e 17-vjeçares, policia ka arrestuar 4 persona si të dyshuar.
Nga hetimet e kryera, ka rezultuar se të arrestuarit në bashkëpunim me njëri-tjetrin prodhonin dhe shisnin lëndë narkotike.
Madje ata kanë nxitur për përdorimin e drogës edhe 17-vjeçaren, të cilës sot tentuan t’i shpërthenin banesën dhe e kanë shfrytëzuar seksualisht.
Lidhur me këtë ngjarje policia arrestoi: E. C. (Ç)., 28 vjeç; F. L., 25 vjeç, i dënuar më parë për veprën penale “Prodhimi dhe shitja e narkotikëve” në Itali; L. S., 17 vjeç dhe A. Sh., 26 vjeç, të gjithë banues në Krujë.
Ndërsa janë shpallur në kërkim; A. B., 23 vjeç, i dënuar më parë për veprën penale “Drejtim i automjeteve në mënyrë të parregullt” dhe A. M., 17 vjeç, të dy banues në Krujë.
