Pas vendimit të Kolegjit Zgjedhor, e cila rrëzoi padinë e PUK-ut për t’u çregjistruar nga këto zgjedhje, kreu i Partisë Uniteti Kombëtar, Idajet Beqiri u shpreh se partia e tij do të shkojë në zgjedhje.
Nëpërmjet një postimi në Facebook, ish-deputeti demokrat, Ervin Salianji ka reaguar duke ironizuar partinë e Idajet Beqirit dhe vendimin e Kolegjit.
“Një parti me emër kodi, PUK kërkon të çregjistrohet, KQZ dhe Kolegji i thonë rri me zor se një ditë do ketë zgjedhje, Rilindja me gjithë çfarë ka thotë u gjykua dekreti”, shprehet Salianji.
Ish-deputeti thekson se nuk është rrëzuar asgjë dhe se dekretet i gjykon vetëm Gjykata Kushtetuese. Nga ana tjetër, kreu i partisë PUK, që kishte bërë ankesën tha se është i detyruar të shkojë në zgjedhje.
“Jemi të detyruar. Është një vendim që jepet nga organi më i lartë. Ky vendim që rrëzon kërkesën tonë dhe thotë që më 30 qershor do shkoni në zgjedhje është detyrues dhe jemi të detyruar të shkojmë në zgjedhje. Thelbi i padisë tonë ishte dekreti i Presidentit. Në iu drejtuam Kolegjit për të mësuar nëse ky dekret i Presidentit është i vlefshëm apo i vlefshëm. Unë mund të kem mendime individuale, personale të miat por problemi ishte që vendimmarrja jonë ishte politike dhe juridike”, shprehet Beqiri.
