Në krahasim me ditën e djeshme, Franca ka shënuar sot një rënie të ndjeshme në numrin e viktimave të shkaktuara nga koronavirusi.
Sipas mediave vendase, në 24 orët e fundit kanë humbur jetën 643 viktima, pra 334 më pak se ditën e djeshme ku u shënuan plot 987 viktima.
Zyrtari i lartë i Ministrisë së Shëndetësisë, Jerome Salomon deklaroi se Franca e ka kaluar tashmë pikun por pandemia mbetet ende aktive.
Ai u shpreh i impresionuar se si popullata është ndërgjegjësuar, duke theksuar se në këtë fundjavë me diell është shumë e rëndësishme që qytetarët të qëndrojnë mbyllur në shtëpi, për të shpëtuar sa më shumë jetë.
Kështu numri i viktimave nga COVID-19 në Francë ka shkuar në 13,832. Në 24 orët e fundit janë regjistruar 4,785 raste të reja duke e çuar në 129,654 numrin total të personave të infektuar nga koronavirusi vdekjeprurës.
Franca mban vendin e katërt si për numrin më të madh të viktimave të shkaktuara nga koronavirusi, ashtu edhe për numrin më të madh të të infektuarve.
Më shumë se 1,7 milionë njerëz nga e gjithë bota janë prekur nga COVID-19, teksa 108,042 persona kanë humbur jetën.
