Operacioni Forca e Ligjit deklaroi më herët sot se i kishte dërguar kërkesat për vetëdeklarim dy vëllezërve vlonjatë.
Altin dhe Mikel Çuçaj janë dënuar më parë për trafikim të lëndëve narkotike në Itali. Sipas ligjit special ta miratuar së fundmi, duhet të përgjigjen me shkrim, brenda 48 orësh, mbi burimet e pasurisë së tyre.
Por njëri nga vëllezërit, Altin Çuçaj ka mohuar të ketë marrë një formular nga policia. I kontaktuar në telefon nga A2, Çuçaj tha se janë bërë edhe më parë hetime për verifikimin e pasurisë së tyre, por se prokuroria i ka pushuar.
“Nuk na ka mbërritur asnjë formular, po e marrim vesh nga TV. Prokuroria ka nisur më herët dy procese për verifikimin e pasurisë sonë dhe i ka pushuar se s’ka gjetur elementë të veprës penale. E çuam çështjen edhe në gjykatë dhe në të gjitha instancat rezulton se gjithçka është konform ligjit. Do t’ju vëmë në dispozicion gjithë dokumentacionin ligjor”, tha ai.
