Vëllai i Sokol Olldashit, Ardian Olldashi, ka reaguar pas deklaratës së Sali Berishës, se Sokol Olldashi ishte politikan më i aftë se Lulzim Basha. Por sipas Berishës, Olldashi humbi përballë Bashës, pasi bëri një gabim duke zgjedhur të mbështetet tek strukturat e partisë dhe jo tek anëtarësia.
Ardian Olldashi thotë se kjo është gënjeshtër, pasi gara u manipulua nga Berisha.
Ky i fundit tha se gara mes ish-deputetit të ndjerë dhe Lulzim Bashës ka qenë e pastër, dhe se nuk ishte ndikuar nga ai vetë. Ai madje tha se Olldashi në rrafshin politik dhe intelektual ishte më i aftë se Basha.
Kjo deklaratë ka hasur në kritikat e vëllait të Sokol Olldashit. Në rrjetet sociale ai shprehet se Sali Berisha gënjen dhe se ka ndërhyrë në çdo kryetar dege për të votuar Bashën.
“Nuk eshte e vertete! Ti e di mire qe Koli fitonte me çdo formule. Te merkuren ne darke, pra ne daten 26.06.2013, Basha te erdhi ne zyre gati duke qare dhe u keshillua me ty per nje terheqje te mundshme te tijen.
Per ç‘arsye? Per arsyen se te dhenat qe vinin e jepnin Kolin ne avantazh.
Ti ke marr personalisht ne telefon pothuajse çdo kryetar neper rrethe. Natyrisht jo per ti uruar naten e mire, sepse ne fakt ishte darke, por per t’i kercenuar me shprehje qe me mire mos t’i perserisim.
Ty dhe jo vetem ty te vjen spontanisht pyetja: Nga i ditkam une keto gjera?
I di nga ata qe ate darke ishin prezent ne zyren tende.
Fatkeqesisht politika eshte i vetmi zanat per te cilin nuk behet shkolle. Rezultatet duken”, shkruan vëllai i Sokol Olldashit.
Sali Berisha krahasoi një ditë më parë të ndjerin Sokol Olldashi me ish-kryetarin e Partisë Demokratike, Lulzim Basha.
Berisha tha se Olldashi ka bërë gabim që ka dalë me mbështetjen e strukturave, ndryshe nga Basha që doli me anëtarët. Berisha pohoi se është habitur me këtë gabim të bërë nga Olldashi, duke pasur parasysh aftësinë e tij.
