Hossein Fereidoun, vëllai i vogël i presidentit iranian, Hassan Rohani, është dënuar me pesë vite burg për korrupsion dhe ryshfet.
Zëdhënësi i gjyqësorit iranian, Gholamhossein Esmaili, tha se vëllai i presidentit mund të përballet edhe me akuza të tjera, duke mos dhënë asnjë detaj tjetër.
“Hetime të shumëfishta janë kryer në lidhje me këtë person, e po ashtu persona të tjerë janë marrë në pyetje, disa prej të cilëve janë në burg”, tha zëdhënësi.
Fereidoun, i cili po ashtu është ndihmës i presidentit, është akuzuar për një kohë të gjatë nga konservatorët për krime financiare dhe korrupsion. Para 2 vitesh, 46 ligjvënës i bënë thirrje Rohanit, të paraqiste vëllain tij para organeve të drejtësisë për t’u përballur me “akuza të korrupsionit”.
