Kryebashkiaku ErionVeliaj ka bërë me dije se do të fillojë aksioni për heqjen e depozitave nga pallatet e Tiranës.
Ky vendim është marrë si një masë mbrojtëse pas tërmetit të 26 nëntorit. Sipas Veliajt, pesha e depozitave rrezikonte seriozisht pallatet dhe qytetarët, për shkak të konstruksionit mbajtës të tarracave.
“Mbi tarracat e pallateve ka një peshë të jashtëzakonshme, që është në mënyrë konstante rrezik për jetën e qytetarëve. Kjo histori ka vazhduar për shumë gjatë në qytetin tonë. Ne nuk duam të jemi ata që nuk mësojmë nga historia, por që mësojmë prej saj. Ndaj, lipset të bëjmë disa gjëra me këtë vendim të KB: Së pari, marrim vendim për të hequr të gjitha depozitat e ujit nga tarracat”, tha ai.
Veliaj tha se depozitat do të vendosen në katin e parë ose në një nga vendet e parkimit. Ai shtoi se depozita do jetë e përbashkët për të gjithë banorët. Veliaj tha se ekziston një mundësi që pallatet me konstrukt të fortë t’i shmangen vendimit por që kjo duhet thënë nga një ekspert, me firmë e vulë.
“Në bashkëpunim me administratorët e pallateve, të kenë mundësi që, si pallatet e reja, në hapësirën e përbashkët, në katin e parë ose në një nga vendet e parkimit, të instalojnë një depozitë të përbashkët për të gjithë banorët. Pra, jo secili të veten. Ne do të lejojmë depozita në tarracë vetëm nëse inxhinierët konstruktorë të licencuar i japin aprovim administratorit të pallatit se tarraca e tyre është mjaftueshëm e fortë për të mbajtur atë peshë. Improvizime të tjera nuk do kemi. Kjo është arsyeja pse do t’i kërkojmë çdo asambleje të pallatit që me administratorin e tyre të bëjë këtë verifikim; do t’i japim leje të përshpejtuar kujtdo që do të bëjë depozitë të përbashkët të pallatit në katin përdhes, në lulishten apo brezin që ka pallati rreth e qark, por kurrsesi nuk do vazhdojmë me këto rreziqe”, deklaroi ai.
