Kryebashkiaku i Tiranës, Erion Veliaj e konsideroi të papranueshëm vendimin e Gjykatës, e cila dha vendim në favor të privatit për stacionet e linjës nr.16 “Linja e Gjelbërt” në kryeqytet.
Sipas Veliajt, Gjykata nuk përqafoi idenë e Bashkisë, por u bë njësh me shoqatën e autobusëve, me pretendimin se linjat dublikohen.
“Unë s’di si t’ia them gjyqtarit që në kohën e pikut, një nga stacionet e Tiranës së Re ose të rrugës së Elbasanit, ka nevojë jo për një, por edhe për 3-4-5 autobusë njëherë.
Por qartazi që gjyqtari s’ka hipur ndonjëherë në autobus dhe qartazi që s’ka kaluar akoma vettingun. Këto çështje do merrem dhe do i adresojmë më vonë. Por sot për ta zhbllokuar këtë situatë kemi reflektuar vendimin e gjykatës për të mënjanuar disa stacione të cilat shoqata mendonte se i dublikonin. Unë mendova se me skandalin e biletave false, shoqata kishte të tjera çështje për të adresuar. Tani që nuk adresoi asnjë nga këto tema, por merret me bashkinë”, deklaroi Veliaj.
Pas këtij vendimi, kryebashkiaku theksoi se cilido gjyqtarë që “fut hundët në favor të privatit”, do t’i denoncojë tek komisionet e vettingut.
“Pas këtij vendimi sot, unë do merrem personalisht duke i çuar denoncimet e mia dhe në emër të Bashkisë së Tiranës te komisioni i vettingut për këdo gjyqtar që vazhdon të fusë hundët në favor të privatit dhe në humbje të interesit të publikut”, shtoi Veliaj.
