Bashkia e Tiranës, në bashkëpunim me Ministrinë e Arsimit prezantoi sot modelin që do të ketë Karta e Studentit, si dhe u tha që shpërndarja do të nisë shumë shpejt.
Kryebashkiaku Erion Veliaj theksoi se Karta e Studentit ishte një detyrim i universiteteve, por kjo nuk u bë prej tyre, çka detyroi bashkinë që ta merrte në dorë procesin.
Ndër të tjera, Veliaj tha se ekziston edhe versioni elektronik i kartës, nëpërmjet telefonit.
“Me autonominë e universiteteve, kjo detyrë i kaloi universiteteve. Kur universitetet nuk e bënë, atëherë thamë po e bën bashkia. Secila bashki, sipas shërbimeve që ofron, do të bëjë kartën.
Sot prezantojmë dy modelet e para të kartës dhe do donim shumë që brenda muajit maj, secili prej jush, të kishte Kartën e Studentit.
Nëse shkoni në një galeri apo kinema, ulja përfitohet menjëherë duke skanuar kartën.
Nëse s’doni ta mbani me vete kartën, kemi edhe një version elektronik të saj, nëpërmjet telefonit”, tha Veliaj.
Ndërkohë, ministrja e Arsimit Besa Shahini deklaroi se karta tashmë do të ofrojë një sërë lehtësirash për studentët, duke filluar nga blerjet me çmime më të lira, e deri tek disa shërbime nga institucionet.
“Është një premtim i para një dekade. Ka qenë edhe një kërkesë në ligjin e arsimit të lartë që nga viti 2007. Ekziston në ligjin e 2015.
Në mënyrë që karta të realizohej do të duhej të kishte një bashkëpunim më të mirë mes universiteteve dhe institucioneve, për të pasur mundësi për të bërë marrëveshjet.
Karta nuk përfshin vetëm uljet që merren nga kompanitë, por edhe shërbimet që përfitohen. Deri tani universitetet nuk kanë qenë shumë aktive në pjesën e tyre.
Kemi marrë përsipër që Ministria bashkë me Bashkinë e Tiranës të realizojë kartën e studentit”, tha ministrja.
