Policia e Shtetit ka vijuar me shkarkimet e disa drejtuesve të policisë në rang vendi. Mësohet se me urdhër të Ardi Veliut, më shumë se 20 shefa komisariatesh janë shkarkuar, si dhe janë bërë edhe emërime të reja.
Në kuadër të një riorganizimi prej dy ditësh, janë duke u bërë një sërë lëvizjes në komisariate, nivel drejtorie por edhe në policinë e kryeqytetit. Ndryshime janë bërë në komisariatet Elbasan, Durrës, Fier, Burrel, Vlorë etj.
Konkretisht Ylli Doda do të jetë shefi i ri i Komisariatit të Policisë Durrës, ndërsa Arjan Doda Nëndrejtor i policisë së Qarkut Durrës.
Vullnet Sila shkon shef komisariati në Elbasan; Edmond Meshini shef i komisariatit numër 3 në Tiranë. Edvin Ndreu pritet që të marrë emërimin si nëndrejtor krimesh në Drejtorinë e Policisë Tiranë.
Po kështu Henigert Mitri, i cili ishte shef komisariati në Burrel, shkon shef Komisariati në Fier. Në Burrel ndërkohë shkon shef Ilirjan Demaj. Ndryshim i rëndësishëm është bërë dhe në Vlorë, ku Artur Selimi, ish-shef komisariati në Fier emërohet nëndrejtor për Rendin në Drejtorinë Vendore të Policisë Vlorë.
Sipas burimeve për “BalkanWeb”, pritet që Gentian Berberi të emërohet nëndrejtor i Policisë së Qarkut Vlorë. Eduard Sulejmani do të marrë drejtimin e Komisariatit Vlorë dhe Syrja Bello vjen në krye të komisariatit Sarandë. Më herët ka pasur ndryshime të tjera në qarqe. Kujtojmë këtu dhe largimin e shefit të komisariatit të policisë Shkodër pas vrasjes së dy vëllezërve Bilali.
