Sipas parashikimit të fundit të meteorologëve, reshjet e shiut do të vijojnë edhe gjatë fundjavës. Kështu, sipas Meteoalb, kthjellime dhe vranësira kalimtare dominojnë motin në të gjithë territorin deri në mesditën e së premtes, kur vranësirat shtohen në territor duke gjeneruar rrebeshe të shkurtra në zonat qendrore. Pasditja dhe mbrëmja mbeten me kthjellime të shkurtra dhe vranësira të shpeshta, por në mesnatë vranësirat mbulojnë të gjithë vendin duke risjellë reshje fillimisht në jug.
Temperaturat e ajrit do të ulen me 2°C gjatë mëngjesit, ndërsa mesdita do të ruajë vlera termike thuajse konstante.
Ndërkohë, nga të dhënat e IGJEUM, lumenjtë Drin, Buna dhe Liqeni i Shkodrës do të vazhdojnë të kenë prurje dhe nivele të larta, të cilat do të varen nga shkarkimet e Kaskadës mbi Lumin Drin.
Lumenjtë e tjerë në të gjithë territorin nuk paraqesin rrezik.
