Kreu i Grupit Parlamentar të LSI-së, Petrit Vasili ka reaguar lidhur me një reportazh të transmetuar nga televizioni Italian, RAI, ku një nga trafikantët e Shijakut fliste për mënyrën se si me paratë e drogës blihen zgjedhjet në vendin Shqipëri.
Në një deklaratë për shtyp, Vasili tha se këto prova tregojnë qartë që Rama ka blerë zgjedhjet në vitin 2017.
“Pas dëshmive të televizionit shtetëror të televizionit Italian RAI2 i cili hedh dritë për vjedhjen e votave në vitin 2017. Narkoshteti dhe marijuana bleu zgjedhjet e 2017 dhe do i blejë edhe të radhës, këtë konfirmon krimi i organizuar. I bëri Edi Ramës të paraqitej në popull pa program duke kërkuar vetëm timonin sepse timonin donin narkotrafikanët. Telekomandën e Edi Ramës e mban në dorë Krimi i organizuar. Ka një pyetje që e ngre dhe RAI për dosjen 339.
Pse kanë frikë të ecin përpara me këtë dosje? Çfarë shantazhesh personazhet e dosjes i bëjnë njëri tjetrit? Çfarë të vërtetash tronditëse kanë për njëri-tjetrin. RAI2 konfirmon që dosja mbahet e bllokuar. Sot i tërë populli shqiptarë së bashku me opozitën janë vendosur në një krah dhe në krahun tjetër ndodhet një Kryeministër mbështetur nga kriminelët. Sfidën e ka fituar dhe e fiton populli. Çdo sekondë i kaluar do jetë shkatërrimtar për Ramë. Shqipëria është e jona dhe nuk e vjedh dot Rama me dosjen 339”, tha Vasili.
