Deputeti i Lëvizjes Socialiste për Integrim, Petrit Vasili ka akuzuar Ramën se i trembet Reformës në Drejtësi.
I ftuar në rubrikën “Opinion” në News 24, Vasili tha ndër të tjera se edhe ndërkombëtarët duhet ta kuptojnë se kush është në të vërtetë ai që i frikësohet Reformës në Drejtësi.
“Vetëm Rama ka frikë nga Reforma në Drejtësi. Këtu kemi vetëm një të trembur, që quhet Edi Rama dhe është kryeministër i vendit, ndërsa nga ana tjetër kemi opozitën. Ndërkombëtarët duhet ta kuptojnë që kemi një frikacak dhe ai frikacak është Edi Rama”, përfundoi Vasili.
Po ashtu, deputeti i LSI-së bëri thirrje që qytetarët t’i bashkohen protestës së 27 janarit, për t’i dhënë fund shtetit të krimit.
Edhe dje, Vasili akuzoi publikisht Ramën në një postim në Facebook se është armiku i vetëm i reformës, duke iu referuar ngjarjes së 21 janarit të 7 viteve më parë.
“Kryeministri armiku publik i vetem i reformes ne drejtesi.
Sot ne 21 janar nuk ka drejtesi sepse kryeministri e vrau reformen ne drejtesi,rivrau idealin e drejtesise se barabarte dhe varrosi cdo iluzion se ai e donte reformen ne drejtesi.
Reforma ne drejtesi filloi hapur kapjen me 69 votat e kryeministrit per prokurorin e pergjithshem.
Rregullorja e parlamentit e propozuar nga kryeministri per te penguar haptas ndjekjen penale ata, qe akuzohen per korrupsion e trafiqe ishte prove pa koment se kryeministri rrenoi drejtesine e paanshme dhe te barabarte per te gjithe.
Lista e manipuluar e kandidateve per KLP dhe KLGJ,qe sherbetoret e tij e bene me zell te shfrenuar, ishte degradimi juridik e moral i reformes ne drejtesi nga kryeministri.
Votimi kunder arrestimit te ish.ministrit te brendshem ishte shpartallimi perfundimtar i hipokrizise zemershqyer te kryeministrit me reformen.
Ndaj sot reforma ne drejtesi ka qartazi armikun publik te vetem te saj…. kryeministrin….. po po vetem ate”, shkroi Vasili.
