Varianti Delta i COVID-19 mund të ketë hyrë në Shqipëri. Ministrja e Shëndetësisë, Ogerta Manastirliu, bëri me dije se ka sinjale të pazakonta nga analizat e kryera në ISHP, për prezencën e variantit Delta në Shqipëri. Një sërë mostrash do të dërgohen në Gjermani, për të arritur deri në një përfundim zyrtar, teksa bëri thirrje që të mos neglizhohet vaksinimi anti-COVID.
“Në Institutin e Shëndetit Publik, janë duke u bërë analizat dhe është vlerësuar që një seri mostrash, të cilat janë identifikuar si sinjale të pazakonta, të çohen në Laboratorin e Referencës në Gjermani, për të bërë vlerësimet e mëtejshme dhe për t’u bërë sekuencimi genomik, në mënyrë që të shihet nëse ka një qarkullim të mundshëm të variantit Delta në Shqipëri”, bëri me dije Manastirliu.
Nga qendra shëndetësore në Sauk, Ministrja e Shëndetësisë u shpreh se vaksinimi do të vijojë me intensitet gjatë verës, teksa një tjetër sasi dozash pritet të mbërrijnë gjatë korrik-gushtit.
Ekspertët janë shprehur më herët se ky variant transmetohet më lehtë, por është më pak vdekjeprurës. Ai ngatërrohet lehtësisht me gripin normal, pasi kanë pothuajse të njëjtat simptoma që janë dhimbje koke, grykë, rrufë e temperaturë.
