Ndonëse varianti Delta ka mbërritur në Shqipëri, do të vijohet me të njëjtat masa anti-Covid. Këtë e ka konfirmuar Zv. ministrja e Shëndetësisë, Mira Rakacolli, e cila qetësoi qytetarët se masat kufizuese nuk ndryshojnë.
“Pavarësisht se është vërtetuar dyshimi i fortë për prezencën e variantit Delta, niveli i masave nuk ndryshon. Masat do të jenë po ato, të cilat kanë qenë më parë”, tha Rakacolli.
Komiteti Teknik i Ekspertëve, në daljen e radhës për mediat, zbuluan se varianti Delta i COVID është shtrirë në 10 qytete. Lajmin e dha drejtoresha e ISHP-së, Albana Fico.
“Numri i Bashkive ka shkuar në 10 ndërkohë që në raport femra meshkuj, 52 me 48 dhe në shërbimin e sëmundjeve infektive janë të shtruar 9 pacientë. Rreth 500 mijë të vaksinuar me dozën e dytë. Varianti Delta në Tiranë, Elbasan, Shkodër, Lezhë, Kavajë, Gjirokastra, Korçë, Peqini, Mati dhe Vlora”, njofton Fico.
Prania e variantit Delta u konfirmua një ditë më parë nga Ministria e Shëndetësisë, pas përgjigjes që erdhi nga kampionet e dërguara në Institutin e Virologjisë – Charite në Berlin të Gjermanisë.
