Një variant shumë ngjitës i koronavirusit të ri që u identifikua fillimisht në Indi tani përbën rreth 58% të të gjitha rasteve të COVID-19 në Shtetet e Bashkuara, sipas Qendrave për Kontrollin dhe Parandalimin e Sëmundjeve.
Të dhënat e azhurnuara nga CDC, tregojnë se varianti Delta, i njohur gjithashtu si B.1.617.2, u vlerësua të ishte përgjegjës për 57.6% të rasteve të sapo konfirmuara në të gjithë vendin nga 20 qershori deri më 3 korrik. Përqindja u vlerësua në vetëm 31.1% dy javë më parë, shkruan ABC News.
Pasi u identifikua fillimisht në Indi në tetor, varianti delta është raportuar që në të paktën 104 vende rreth globit dhe pritet që së shpejti të jetë varianti dominues i koronavirusit që qarkullon në të gjithë botën, sipas Organizatës Botërore të Shëndetësisë. Varianti u zbulua për herë të parë në SHBA në Mars dhe tani është i pranishëm në të 50 shtetet.
“Varianti Delta është duke u përhapur nëpër botë me një ritëm përvëlues, duke sjellë një rritje të rasteve dhe vdekjeve,” tha Drejtori i Përgjithshëm i OBSH-së Tedros Adhanom Gebreyesus gjatë një konferencë për shtyp në Gjenevë.
