Ish-shefi i Emergjencave në Itali, ka dhënë një tjetër paralajmërim të fortë. Në kohën kur ka një konkurrencë të ashpër se kush nga vaksinat do të dalë më shpejt në treg, dhe sa të efektshme janë, Guido Bertolaso flet për një valë të tretë. Me uljen e temperaturave është vënë re një agravim i situatës në mbarë botën, ndërsa të infektuarit po shtohen me shifra të frikshme.
“Mes shkurtit dhe marsit do të ketë një valë të tretë Covid-i, dhe nëse ndokush mendon se në Krishtlindje do të jemi të gjithë të çliruar nga virusi, gabohet”. Kështu është shprehur Guido Bertolaso, ndërsa merrte pjesë në emisionin “105 Friends” të Radio 105.
Duke folur për situatën në zonën e Umbrias, ku është konsulent i Rajonit për menaxhimin e emergjencës së pandemisë, ish shefi i Emergjencave Civile në Itali ka shpjeguar se “situata është mjaftueshëm nën kontroll, falë spitaleve fushore ushtarake dhe Kryqit të Kuq që janë instaluar në Perugia dhe Terni”.
