Një ditë më parë, Britania i dha autorizim emergjent vaksinës eksperimentale të zhvilluar nga Pfizrer dhe BioNTech. Britania është vendi i parë perëndimor që miraton vaksinën, një lëvizje që shumë e shohin si një objektiv politik të qeverisë së Boris Johnson, që është përballur me kritika në trajtimin e pandemisë. Drejtori ekzekutiv i Pfizer ka konfirmuar se deri në fund të vitit tjetër, do të ketë mjaftueshëm vaksina, por çdo shtet duhet të jetë i kujdesshëm me masat e ndërmarra.
Drejtori ekzekutiv i kompanisë Pfizer, Albert Bourla, ka deklaruar se është i bindur që deri në fund të vitit 2021, do të ketë më shumë doza të vaksinës, sesa do të jetë e nevojshme në luftën kundër pandemisë.
“Jam i bindur që deri në fund të vitit 2021, do të ketë më shumë vaksina sesa do të kemi nevojë. Po bëjmë gjithçka që të rrisim kapacitetet prodhuese, por problemi qëndron se ato duhet t’i rrisim gjatë muajve të ardhshëm”, ka thënë Bourla.
Ai ka kërkuar nga qeveritë përkatëse, që të mos i lehtësojnë masat mbrojtëse. “Është e rëndësishme që vaksinën ta përdorim si një mjet”, ka thënë ndër të tjera drejtori ekzekutiv, i cili shtoi se pa dyshim se do të jetë më efikase dhe me një efekt afatgjatë.
“Koha kur do t’i kthehemi normalitetit nuk është larg, por sigurisht jemi ende herët”, tha më tej ai.
