Gazeta gjermane “Welt am Sonntag” shkruan se shkencëtarët gjermanë po punojnë për një vaksinë kundër koronavirusit. Por presidenti i SHBA, Donald Trump, po i ofron shuma të mëdha parash kërkuesve, pasi dëshiron të ketë të drejta eskluzive për punën e tyre.
Një burim qeveritar gjerman i tha gazetës se Trumpi po bën gjithçka që ka në dorë, për ta siguruar vaksinën “vetëm për SHBA”.
Por një zëdhënës i Ministrisë së Shëndetësisë në Gjermani, i tha gazetës “Die Welt” se qeveria gjermane mendon ndryshe. “Qeveria gjermane është shumë e interesuar që zhvillimi i vaksinave dhe trajtimeve kundër virusit të ri Corona të bëhet në Gjermani, dhe në Evropë”. Edhe qeveria gjermane po i ofron firmës përparësi financiare.
Firma CureVac, e vendosur në jug të Gjermanisë, po bën kërkime për disa vaksina të mundshme, dhe dy prototipe do të zgjidhen për test. Bashkëthemeluesi i CureVac dhe shefi i sektorit të prodhimit Florian von der Mülbe i tha “Reutersit” se kompania shpreson ta ketë një vaksinë eksperimentale në qershor ose korrik. Pas kësaj do të merret aprovimi për ta testuar atë tek njerëzit.
Dy javë më parë, shefi i atëhershëm i bordit i CureVac, Daniel Menichella u takua në Shtëpinë e Bardhë me Trumpin dhe me stafin e tij. Nëntë ditë pas takimit, më 11 mars, firma CureTec e largoi Menichellan nga posti, dhe e zëvendësoi me themeluesin e kompanisë Ingmar Hoerr.
Presidenti amerikan Trump ka shpallur Emergjencë Kombëtare për epideminë e koronavirusit, dhe ka alokuar 50 miliardë dollarë fonde, në mbështetje të sistemit shëndetësorë dhe faktorëve ekonomik të prekur.
Donald Trump tha se ai do të përdorë gjithë fuqinë e qeverisë federale, dhe nuk do të kursehet asnjë burim financiar, si dhe do të bashkëpunojë me sektorin privat për të zhvilluar teste dhe trajtime. Presidenti gjithashtu garantoi se 500 000 teste tamponi do të jenë gati në fillim të javës.
