Para dy ditësh, kryeministri Rama lajmëroi nisjen e procesit të vaksinimit në vendin tonë, i cili do të bëhej në ambjentet e stadiumit Air Albania. Të parët që do vaksionohen, do të jenë personeli shëndetësor dhe me pas do kalohet tek të moshuarit. Një dilemë më vete është nëse kryerja e vaksinës do të sjellë efekte anësore. Të gjitha këto i ka sqaruar mjekja mikrobiologe në Institutin e Shëndetit Publik, Blerta Brati, e cila ishte e ftuar në emisionin e mëngjesit në Top Channel “Wake Up”. Ajo shpjegoi me detaje çfarë efektesh anësore sjell kjo vaksinë.
“Njeriu duhet ta dijë që sapo lind vaksinohet. Kështu që çdo vaksinë kalon fazat e veta, kalon gjithë provat e nevojshme para se të vijë në shërbim të njerëzve. Vaksina që është aktuale dhe njerëzit me të vërtetë kanë një lloj frike dhe stepje, pasi është hera e parë që përdoret në njerëz. Pfizer dhe Moderna përdor ‘ARN mesager’, që nuk është gjë tjetër veçse një sekuencë kalimtare, një fotokopje e ADN së virusit, e cila do prodhojë gjithë informacionin gjenetik të mundshëm për prodhimin e proteinave në trupin e njeriut, që të ketë mundësi pastaj ta shndërrojë trupin e njeriut në një fabrikë prodhimi proteinash.
Por, pas disa ditësh ajo do shkatërrohet dhe gjithë procesi do të ndodhë në citoplazmën e qelizës dhe jo në bërthamën e qelizës ku është ADN-ja. Efektet anësore janë efekte të lehta që prekin 1 në 10 persona. Dhimbje në vendin e injektimit, skuqje, dhimbje e përgjithshme, mund të kenë dhimbje koke, mund të ketë të dridhura. Por nuk duhet të shqetësohemi, pasi tregon se kjo vaksinë po jep efekt. Pastaj, efektet më të rënda, ajo që është vënë re është se 1 në 100 mijë ka një shok alergjik”, u shpreh mjekja.
