Qeveria shqiptare ka dërguar në Kuvend projektligjin për blerjen e vaksinës kundër Covid-19. Këshilli i Ministrave ka bërë marrëveshje me kompaninë Covax, për të siguruar dozat për të vaksinuar popullsinë. Shteti shqiptar do të paguajë 3 990 000 dollarë për këtë kontratë.
“Qëllimi i projektligjit është ratifikimi i marrëveshjes së angazhimit, ndёrmjet Republikës së Shqipërisë dhe Aleancës GAVI, për pjesëmarrjen në strukturën globale të qasjes në vaksinat COVID-19 (COVAX Facility), e cila është miratuar, në parim, nga Këshilli i Ministrave, me vendimin nr.734, datë 16.9.2020, “Për miratimin, në parim, të marrëveshjes së angazhimit, ndërmjet Këshillit të Ministrave të Republikës së Shqipërisë, përfaqësuar nga Ministria e Shëndetësisë dhe Mbrojtjes Sociale, dhe Aleancës GAVI, për pjesëmarrjen në strukturën globale të qasjes në vaksinat COVID-19 (COVAX FACILITY)”, thuhet në projektligjin e depozituar në Kuvend.
Në këtë program janë të përfshira aktualisht 80 shtete në të gjithë botën, përfshirë edhe vendet e BE-së. Sipas projektligjit, Shqipëria pritet të marrë 1 140 000 doza, shifër kjo që mbulon 20% të popullsisë.
“COVAX Facility” është një mekanizëm ndërkombëtar që koordinon resurset dhe kërkesën për vaksinë ndaj Covid-19, me kapacitetet prodhuese të kësaj vaksine.
Fillimisht do të furnizohen të gjitha vendet me mjaftueshëm doza për të mbuluar 20% të popullsisë. Më pas do të vijojë furnizimi i vendeve me pjesën e mbetur të dozave të kërkuara.
