Zv.Ministrja e Shëndetësisë Rakacolli vijon të mbështesë idenë se përdorimi i transportit publik është një problem individual.
Sipas saj, janë njerëzit ata që duhet të zgjedhin orarin e përshtatshëm kur duhet të hipin në urbane, për të shmangur fluksin dhe për të respektuar distancimin social.
Në ”Ora News”, Rakacolli u bëri thirrje dhe sistemit të transportit që të respektojnë protokollet anti-covid.
Pyetje: ‘‘Distancimi fizik është i pamundur teksa ne shohim që urbanët janë plot dhe njerëzit padiskutim që duhet t’i përdorin urbanët në kryeqytet apo kudo për të kryer nevojat e tyre, qoftë familjare, qoftë ekonomike, qoftë të punës. Pra nuk e shmang dot sepse edhe vetë autoritetet apo përfaqësuesit e urbanëve nuk respektojnë masat. Si do duhet të veprojmë?”
Mira Rakacolli: ”Po të respektojnë masat nuk ndodhin. Është e vërtetë ajo që thatë ju, domethënë transporti publik përdoret gjerësisht për nevojat. Normalisht pandemia na ka ndryshuar nivelin e normalitetit të jetës. Nëse unë përdor transportin publik më ka vënë mua përpara edhe zgjidhjen e problemit .
Nëse unë më përpara po të shikoja një autobus plot, nëse do gjeja vend do futesha, tashmë duhet ta shikoj me një sy tjetër. Nuk duhet të hip në autobus, pra zgjedhja në radhë të parë është e imja, po mua kjo do më kondicionojë mungesën në punë sepse janë distanca të largëta. Atëherë do më duhet që të çohem më herët, do marr një autobus tjetër, do t’i jap kohë vetes që unë të zgjedh pak a shumë orën më të përshtatshme për të hipur në autobus, kur mundet që unë mos të shkoj në atë orën e fluksit dhe të mundohem ta respektoj. Ky është problem individual.
Pastaj është edhe problemi që thatë ju, drejtuesi i autobusit. Ai që drejton autobusin ka një përgjegjësi për shëndetin publik sepse edhe kur janë dhënë lejet për të filluar transportin publik ka protokolle Covid. Ata të gjithë duhet që t’i respektojnë këto protokolle dhe kur ato kapen me shkelje ato gjithmonë marrin penalitete.”
