Kryeministri në detyrë i Kosovës, Ramush Haradinaj mohoi në mënyrë të prerë të gjitha akuzat se qeveria e tij ka shpenzuar rreth gjysmë milionë euro për dreka.
Gjatë një interviste për “Rtv21”, Haradinaj u shpreh se nga buxheti i shtetit nuk ka shpenzuar “as edhe 1 cent”, për një drekë të vetën.
“Asnjë cent të Kosovës Ramush Haradinaj nuk e ka harxhuar për një drekë të veten. Asnjëherë. Drekë unë ha në zyre, një byrek, një diçka.
Shteti ka obligime, pritje, palë, protokoll shtetëror, reprezentacion, pritje qysh i keni pa, sa i përket atyre, ato kanë ndodhë. Sa i përket mënyra se si i kanë dhënë stafi, po muj me i thanë popullit po nuk janë stafi jem. Ata i ka sjellë Hashimi prej kur ka qenë kryeministër.
Janë që i ka sjellë Isa, e tjetër kush. Shumë të idhnum janë po ashtu me mu, se mendojnë që jam bë unë shkaktar që i kam qit në opozitë. Pra kam krijuar armiq brenda administratës një pjesë të tyre dhe marrë goditje të shumta. Nuk është e vërtetë. Kryeministria, kryeministri ka shpenzuar dreka e darka çka po thonë ata. Shteti i Kosovës, reprezentacioni. Nuk ka dreka e darka Ramush Haradinaj”, deklaroi Haradinaj.
