Trajneri i njohur Luis Felipe Scolari ka rrëfyer publikisht reagimin e Cristiano Ronaldos, kur i tregoi se babai i tij ka ndërruar jetë.
Scolari tregon se kur e lajmëroi CR7 për humbjen e babait, ai mori një vendim që rrallëkush e ndërmerr!
Sipas tij, Ronaldo vendosi që të luante të nesërmen dhe madje trajneri pohon se ai shkëlqeu:
“Cristiano mund të bëhet një trajner i madh, por në të ardhmen e shoh si drejtues tek ndonjë klub prestigjioz. Ishte 22 vjeç kur e bëra kapiten të kombëtares, ai e ka pasur gjithmonë mentalitetin e liderit. Është një lider pozitiv dhe sillet shumë mirë me shokët e skuadrës.
Nuk mund të gjenim një pasardhës më të mirë pas largimit të Luis Figos. Nuk e harroj kurrë momentin kur vdiq babai i tij. Ndodheshim në Rusi kur na dhanë lajmin. Të gjithë u shokuam, unë i pari. Cristiano ishte në moshën e djalit tim dhe shkova t’i tregoja çfarë kishte ndodhur.
I fola siç i flet një baba djalit të tij. Biseduam për rreth 40 minuta dhe lotët nuk munguan nga të dy palët. U preka jashtëzakonisht shumë që iu desh të përballej me një dhimbje të tillë në moshë kaq të re.
I dhamë mundësinë të rikthehej menjëherë në Portugali, por Cristiano më tha: ‘Nuk kthehem, do të zbres në fushë nesër dhe më pas do të shkoj tek familja ime’.
CR7 luajti dhe shkëlqeu të nesërmen.
Kjo tregon gjithashtu se si ai është një profesionist me cilësi shumë të lartë. Gjithçka e ka arritur më punë. Meriton gjithçka që ka arritur, disiplina dhe përkushtimi i madh janë sekretet e tij”.
