Gjenerali turk në pension, Deniz Kutluk, i ka kërkuar presidentit Erdogan të lëshojë një “ultimatum” për Greqinë.
Sipas këtij ultimatumi, Greqia duhet të tërhiqet brenda 48 orëve nga ishujt e Egjeut ose në të kundërt të ndërhyhet ushtarakisht.
“Turqia duhet të thotë se “Greqia brenda 48 orësh të tërhiqet ose përndryshe ne e kemi këtë fuqi për t’i marrë një nga një”, tha ai.
Sipas “Prothema.gr”, ai akuzon shtetin grek se kërkon të ndërhyjë në zonat detare që i përkasin Turqisë, teksa paralajmëron se nëse reagon mund ta pësojë.
“Greqia duke thënë se “Shtetet e Bashkuara më mbështetën, ne e zgjidhëm çështjen me Egjiptin”, bënë hapa drejt rajoneve të Turqisë. Flotat tani janë në fushë. Forcat greke janë në Egje.
Me shumë mundësi nëndetëset e tyre janë në Mesdhe. Forcat greke janë fshehur prapa ishujve dhe po presin. Flota turke e di këtë dhe ka marrë pozicione strategjike. Nëse Turqia dëshiron t’i marrë, i merr ato ishuj. Ajo që po bën Greqia është një shkelje e ligjit ndërkombëtar”, tha ai.
Sa i përket ndërhyrjes së Francës, Kutluk e akuzon vendin për shkelje të ligjit ndërkombëtar. Sipas tij, forcat turke mund të kapnin aeroplanmbajtësen franceze që lundronte në Mesdheun Lindor brenda dy ditësh.
“Franca është e angazhuar në dërgimin e avionëve luftarakë atje dhe ngritjen e një baze ajrore në Qipro. Këto janë manovra gjeopolitike. Nga njëra anë, ata duan të shesin armë dhe anije në Greqi. Këto hapa duhet të ndalen nga organet ndërkombëtare sepse ato janë shkelje e ligjit. Por nuk besoj se Franca dhe Turqia do të përplasen”, përfundoi ai.
