Deputeti i Partisë Socialste që njëkohësisht është dhe anëtar i Këshillit të Mandateve, Ulsi Manja ka reaguar për deklaratën e Prokurorisë për çështjen Tahiri. Përmes një statusi në rrjetin social “Facebook” Manja thotë se Prokuroria nuk mund të bëjë deklarata politike dhe të sulmojë kryeministrin, pasi sipas tij shkelet Kushtetuta. Sipas tij ligji ua ndalon Prokurorëve të bëjnë deklarata politike ose të japin mendime për veprimtarinë e organeve të tjera. Me anë të portimit të tij deputeti kërkon shkarkimin e prokurorit që merret me çështje Tahiri.
Statusi i Ulsi Manja:
Më kanë pyetur shumë njerëz a ka të drejtë prokuroria të bëjë deklarata politike si ajo e djeshmja, ja përgjigja ime:
Deklarata politike si ajo e djeshmja në mënyrë kategorike jo, madje as nuk duhet ti çojnë nëpër mend e jo më ti bëjnë publike në media sepse e ndalon Neni 9 paragrafi i 3 i ligjit “Për Organizimin dhe Funksionimin e Prokurorisë në R.SH” ku thuhet qartë dhe pastër, “ prokurorëve u ndalohet të bëjnë deklarata ose të japin mendime për veprimtarinë e organeve të tjera”, e jo më të sulmojnë Kryeministrin që mban një fjalim politik në një forum të partisë së tij !!!
Besoj kaq e kupton edhe një që nuk është jurist!
Po kur prokurori e bën një deklaratë të tillë politike si ajo e djeshmja ç’farë pasojash ligjore ka?
Kjo konsiderohet si shkelje e betimit të bërë solemnisht “për ti qëndruar kurdoherë besnik Kushtetutës së Republikës së Shqipërisë, ligjeve në fuqi dhe respektimit të rregullave të etikës profesionale në kryerjen e detyrës” , dhe në bazë të Nenit 148/dh të Kushtetutës së Shqipërisë , prokurori shkarkohet nga Këshilli i Lartë i Prokurorisë për “shkelje të rënda profesionale ose etike që diskretitojnë pozitën dhe figurën e prokurorit gjatë ushtrimit të detyrës”, respektivisht shkelen Nenet 37, 101/c dhe 102/ë të ligjit “Për Statusin e Gjyqtarëve dhe Prokurorëve në R.SH”.
As edhe për të kuptuar këto nuk duhet të jesh jurist i shquar mjafton të hapësh defterët e ligjit dhe i kupton gjithkush.
Kaq besoj mjafton o dashamirës të drejtësisë dhe ligjit për të kuptuar kush e ka shkel ligjin në këtë rast prokurori apo Kryeministri !
Ndoshta i kam rënë pak gjatë po kështu jemi ne juristët!
