Raporti i fundit i stabilitetit financiar, nga Banka e Shqipërisë, konfirmoi përmirësimet e ndjeshme të bëra nga sistemi bankar në uljen e kredive me probleme. Si raport ndaj totalit, ky tregues ka rënë tashmë në kufijtë e 11%, niveli më i ulët në pothuajse një dekadë.
Por, përmirësimet gjatë vitit të kaluar janë të dukshme edhe duke e analizuar portofolin me probleme në vlerë absolute. Sipas Bankës së Shqipërisë, për vitin 2018, kredia me probleme ra me gati 17% në nivelin 64 miliardë lekë. Edhe më e rëndësishme është se tashmë kontributin kryesor në uljen e kredive me probleme po e japin shlyerjet e tyre. Banka qendrore vë në dukje se vlerat e arkëtimeve të kredive me probleme paraqiten në nivele të mira, duke evidentuar përpjekjet e bankave dhe duke forcuar qëndrueshmërinë e prirjes rënëse të këtij treguesi.
Vitin e kaluar u shlyen 17.6 miliardë lekë, ose rreth 140 milionë euro kredi në vonesë. Mbiçmimi i kursit të këmbimit dhe normat më të ulëta të interesit kanë ndikuar në përmirësimin e aftësisë paguese të huamarrësve.
Kjo shifër, megjithatë, përfshin pjesërisht edhe disa shitje nga portofoli i bankave, të bëra në fund të vitit. Ndërkohë, fshirjet e kredive të humbura nga bilancet tashmë kanë rënë dhe po japin një kontribut më modest. Për vitin e kaluar, ato kishin vlerën e 4.5 miliardë lekëve. Që prej fillimit të vitit 2015, vlerësohet se bankat kanë larguar nga bilancet e tyre gati 55.5 miliardë lekë kredi të humbura.
Nga ana tjetër, Banka e Shqipërisë nënvizon se edhe mbulimi me kolateral i kredive problematike mbetet në nivele të larta, çka e zbut rrezikun për bankat.
M egjithë përmirësimin, në raport Banka e Shqipërisë thekson se është e nevojshme që bankat të ruajnë ritmet e uljes së kredive me probleme. Kjo është veçanërisht e rëndësishme për ato banka për të cilat niveli i kredive me probleme është mbi mesataren e sektorit. /SCAN
