Berisha ka shprehur solidaritetin e tij për Ukrainën, që rrezikohet nga një pushtim i mundshëm rus. Në fjalën e marrë në Kuvend, Berisha propozoi që Shqipëria të dërgojë fishekë dhe municione në Ukrainë. Ish-kryeministri hodhi akuza të rënda ndaj Edi Ramës dhe Lulzim Bashës, që siç thotë ai, heshtin dhe kjo i shërben Serbisë.
“A po kërcënohet për pushtim një vend sovran? Çfarë është kjo narko-qeveri dhe ky narko-parlament që nuk thotë një fjalë të vetme? A rrihet në këtë Parlament apo jo? Më thoni mua. Jo nuk rrihet. Natyrisht, por jam këtu për t’i shprehur solidaritetin tim të plotë në emër të PD, kombit ukrainas. Jam këtu për të ngritur zërin, për të ndihmuar Ukrainën që kërcënohet nga një barbari e Kremlinit.
Shqipëria duhet të bëjë gjithçka për të ndihmuar këtë vend. Të paktën fishekë dhe municione mund t’u dërgohen atyre, por argati i Beogradit jo më kot hesht. Ju zotërinj deputetë duhet të ngrini zërin se përfaqësoni PD, jo Lul Bravën”, tha Berisha.
Perëndimi është i shqetësuar se Rusia po planifikon të pushtojë Ukrainën, dhe po kryen një sërë manovrash të tjera ushtarake në rajon. Moska kërkon garanci që Ukraina dhe vendet e tjera ish-sovjetike nuk do të lejohen të anëtarësohen në NATO, dhe që aleanca të tërheqë trupat nga vendet e tjera të ish-bllokut sovjetik.
Referuar kësaj kërkese, një kundërpërgjigje ka ardhur nga Taulant Balla. Nga foltorja e Kuvendit, ai u shpreh se gjuha shkon ku dhëmb dhembi, duke iu referuar tragjedisë së Gërdecit në 2008, ku humbën jetën në një fabrikë të demontimit të armëve 26 persona.
Balla u shpreh se pozicioni i Shqipërisë në përplasjen Rusi-Ukrainë është i qartë, dhe krah aleatëve të NATO-s. “I vetmi deputet “non grata” nga SHBA, duhet të mos ishte në këtë sallë. Sa i përket çështjes së fishekëve, gjuha shkon ku dhemb dhëmbi. Ne shqiptarët e dimë se si u shitën fishekët që shkaktuan edhe tragjedinë e Gërdecit, por falë drejtësisë së re uroj të gjenden pronarët e asaj fabrike vdekje në Gërdec. Qëndrimi i Shqipërisë është i koordinuar me SHBA-në. Prezenca e Shqipërisë në kuadër të NATO-s do të jetë gjithmonë si një aleat i besueshëm. Pozicioni i Shqipërisë është i qartë”, tha Balla.
