Pas deklaratës së kryeministrit të Greqisë, Kyriakos Mitsotakis, ku tha se Greqia do të sigurojë 12 milje edhe në detin Jon, një reagim ka ardhur nga kryeministri Rama.
Kreu i qeverisë është ngacmuar nga një komentues në Facebook, i cili i ka shkruar se ujërat detare ia ka falur Greqisë. Rama thotë se nuk mund të flasë për falje detesh, sikur flet për falje rrobash. Ai shprehet se nuk falen detet e tokat si rrobat.
Qytetari- Ujërat detare të Shqipërisë ja fale Greqisë?
Edi Rama– Te rrofte Skenderbeu ne balle kur ne koke ke Saliun dhe flet per “falje detesh” sikur flet per falje rrobash! Hajde shqipe hajde! Nuk falen detet e tokat si rroba o mik, prandaj para se te flasesh per tema te tilla, ulu lexo, rri degjo, informohu e pastaj shprehu dhe ruhu nga genjeshtrat e medha se po te kapen ne gjume, i hengre e ike ne drejtim te paditur!
“Greqia do të zgjerojë kufijtë e saj detar në 12 milje!”. Kështu ka deklaruar kryeministri grek, gjatë seancës parlamentare të mbajtur sot në parlament. Mitsotakis deklaroi se amendamenti do të bëhet publik së shpejti, dhe është i bazuar në nenin e tretë të Ligjit Ndërkombëtar detar, i cili thekson se shtetet kanë të drejtë të zgjerojnë kufijtë e tyre deri në 12 milje detare.
Ai zbuloi më tej se Ministri i Jashtëm, Nikos Dendias do të udhëtojë në Tiranë, për të biseduar me homologun e tij të Shqipërisë për demarkacionin në kufijtë detarë midis dy vendeve fqinje, një projekt që është punuar gjatë viteve të fundit. Nuk ka një datë zyrtare se kur Dendias do të vijë në Shqipëri, por mësohet se më herët ai ka zhvilluar një bisedë telefonike me Ramën.
