Përballja kryesore e eventit të UFC Atlantic City, ka qenë po aq spektakolare sa pritej. 5 raunde që dhuruan spektakël dhe në fund u mbzllën me një “KO Teknik”. Kevin Lee mposhti Edson Barbosan me një duel që kishte një rrjedhojë si në filma, pasi Lee në fillim pësoi disa goditje mjaft të forta dhe më pas e mori veten duke i shkaktuar një frakturë të rëndë brazilianit që detyroi mjekët të futeshin në kafaz. Ky ishte suksesi i 17-të në karrierën e kampionit amerikan, ku ka pësuar vetëm 3 humbje.
Barbosa u dëmtua keq në syrin e djathtë, nga ku rridhte shumë gjak, duke e bërë të pamundur zhvillimin e mëtejshëm të sfidës. “Doja t’i tregoja të gjithëve që mund të dueloja 5 raunde. Jam sportisti më i fortë i divizionit (pesha e lehtë) dhe mund të përballem me të gjithë. Kur unë godas, të tjerët dëmtohen dhe Barbosa e kuptoi sot këtë gjë”, tha Kevin Lee pas përfundimit të sfidës. Për Barbosa kjo është humbja e 6-të në karrierë (ka edhe 19 fitore).
Edhe pse Barbosa e goditi fort me shkelm rivalin në raundet e hapjes, Lee arriti të qëndrojë në këmbë dhe falë aftësive të tij si mundës arriti të qëndrojë në këmbë dhe të rikuperojë me kalimin e kohës. Madje Lee realizoi edhe një “takedown” dhe një “cobwebs”, duke qenë favorit për ta fituar duelin edhe me pikë. Barbosa u përpoq ta rikthejë duelin në favorin e tij në dy raundet e fundit, por Lee ishte më teknik dhe kontrolloi avantazhin.
