Amanda Nunes ka mbrojtur për herë të tretë titullin kampion bote në peshën “bantamweight” (pesha gjel), pas fitores me “KO teknik” në raundin e pestë ndaj amerikanes Raquel Pennington, sfidë e vlefshme për eventin e UFC-224, zhvilluar sot në Rio de Zhaneiro të Brazilit.Braziliania zhvillonte për herë të parë një duel në kafaz përballë fansave të saj, ku mposhti miken e saj amerikane. Nunes ishte më e përgatitur fizikisht dhe me kalimin e kohës ruajti freskinë fizike, duke i dhënë goditjen finale rivales në raundin e pestë dhe të fundit.
“Jetoj në Amerikë, por jam braziliane dhe përfaqësoj këtë vend, duke mbajtur flamurin e vendit tim. Ishte një duel i fortë, Pennington është një mikja ime dhe për mua nuk ishte e lehtë ta zhvillojë këtë duel. Nuk isha përballur kurrë me një mikeshë më parë në kafaz”, tha Nunes, 16 fitore dhe 4 humbje në artet marciale mikse në karrierën e saj. Ndërsa Pennington, që rikthehej në kafaz pas më shumë se 18 muajsh, pësoi humbjen e 6-të, ndërkohë që ka edhe 9 fitore.