Pas arrestimit të një dite më parë të 26-vjecares Adjola Lakra, policia ka marrë në mbrojtje familjen e saj. Dyshimet janë që ajo të ketë bashkëpunuar me vrasësit e Hekuran Billës.
E reja ka treguar për policinë se nuk ka pasur asnjë dijeni për planin e vrasjes, dhe kur mësoi se Hekuran Billa ishte vrarë kishte mbyllur çdo rrjet social dhe kishte ndërruar numrin e telefonit. Pas arrestimit të mikut të saj Sebastiano Mali, ajo ishte zhvendosur nga Tirana në Berat, ku jetonte në banesën e një shoqeje aty ku edhe u arrestua.
Ishte Lakra, sikurse pretendon Prokuroria, që nxorri në pritë 41-vjeçarin mbrëmjen e 11 qershorit.
Adjola Lakra është njohur me Billën vetëm 4 ditë pasi ai doli nga burgu i Fushë-Krujës. Kontaktet e para kanë qenë përmes Instagramit. Pasi u bënë miq në këtë rrjet social, dhe shkëmbyen disa mesazhe, ata u takuan. Vajza ka treguar se me Hekuranin nuk kishte një lidhje të vazhdueshme, por frekuentoheshin herë pas here kur Hekurani vinte në kryeqytet.
