Kryeministri Edi Rama, ka shprehur ngushëllimet për familjarët e efektivit të policisë që u vra nga 21-vjeçari Aldi Rama. Kreu i qeverisë tha se ndonëse boshllëkun në familje nuk e shlyen asgjë, qeveria ka miratuar fondin 170% të rrogës së prindit çdo muaj, për fëmijët e Saimir Hoxhës deri kur të arrijnë moshën e pjekurisë. Rama tha se nuk ka fonde që të plotësojë boshllëkun për familjen, por përgjegjësia e shtetit është që fëmijët e dëshmorëve që japin jetën në krye të detyrës, të mos mbeten vetëm.
“Është një moment i rëndë për të gjitha forcat tona të Policisë së Shtetit, patjetër edhe për shoqërinë. Duke i shprehur ngushëllimet familjarëve dhe kolegëve që e kanë njohur nga afër këtë dëshmor të ri, por dhe të gjithë punonjësve të policisë, e shoh të udhës t’ju bëj me dije se qeveria ka vendosur sot një mbështetje të konsiderueshme financiare për familjen.
Por me të hyrë në fuqi në parlament ligji për fëmijët e Republikës, ata do të marrin rrogën 170% të prindit deri kur të arrijnë moshën e pjekurisë. Nuk ka fonde materiale që plotëson boshllëkun për familjen, por përgjegjësia e Republikës është që fëmijët e dëshmorëve që japin jetën në krye të detyrës, të mos mbeten vetëm por të ndjehen deri në fund të mbështetur dhe të përkrahur për të qenë krenarë jo vetëm për prindin, por edhe shtetin të cilit babai i shërbeu deri në momentin e fundit”, tha Rama.
