Gjykata e Tiranës ka lënë në burg prokurorin Edmond Karriqin. Po të njëjtën masë sigurie, ka marrë dhe shoferi i tij Isuf Gega. GKKO ka lënë në burg drejtuesin e prokurorisë së Kukësit, Edmond Karriqin, i cili u arrestua pak ditë më parë për korrupsion si dhe shoferin e tij Isuf Gegën. ‘Arrest në burg’ është dhënë edhe për dy personat e tjerë të përfshirë, Emirjan Beu dhe Dritan Dedja.
Kreu i Prokurorisë Kukës, Edmond Karriqi, i prangosur nga SPAK, është vëzhguar dhe përgjuar prej javësh, ku është vërtetuar edhe marrja e shumës prej 2 mijë euro kundër zbutjes së masës së vendimit për një të arrestuar. Edhe pse deri tani është faktuar përmes filmimeve vetëm rryshfeti prej 2 mijë euro që prokuroi mori përmes sekserëve të ngjarjes, mendohet se thuajse të njëjtën shumë mund të ketë marrë nga të pakën 3 persona që u ka lehtësuar masën e sigurisë.
SPAK e ka hetuar, përgjuar e vëzhguar prej kohësh takimet që prokurori i Kukësit zhvillonte me sekserët e tij. Paratë i janë dhënë në dollarë, por nuk janë pranuar nga prokurori Karriqi dhe për këtë sekseri i ka kthyer ato në këmbim valutor në euro dhe më pas ia ka dhënë. Gjatë kontrolleve në shtëpinë e tij, SPAK ka gjetur vetëm shumën prej 200 mijë lekë të reja, që nuk cilësohet si shumë e konsiderueshme për hetim.