Biznesmeni Ervin Mata ka dhënë dëshminë e tij në polici pas vetë-dorëzimit mbrëmjen e djeshme pas katër muajsh arrati.
Sipas Balkanweb, ai nuk ka folur shumë në polici, por ka thënë se u dorëzua pasi nuk ka lidhje me vrasjen e Fabiol Gaxhës dhe plagosjen e Ervis Martinajt e Elion Hatos.
Ai po ashtu është shprehur se nuk ka konflikte me asnjë person.
Për ngjarjen vijon të qëndrojë në burg biznesmeni tjetër Ervis Martinaj, ndërsa Geldo Hoti, Ajaks Boshnjaku, Redi Popesku, Fabiol Alushi u lanë të lirë pas arrestimit. I lirë u la edhe Eljo Hato, i plagosur bashkë me Martinajn.
Sipas njoftimeve paraprake, që nga mbrëmja e 4 tetorit, Ervin Mata fshihej në Tiranë.
Pikërisht më 4 tetor, pas një sherri të ndodhur në një prej lokaleve në zonën e ish-bllokut, mbeti i vrarë Fabiol Gaxhaj, ndërsa u plagosën disa persona.
Në njoftimin e policisë saktësohet se “Ervin Mata është person i dyshuar për kryerjen e veprave penale të “Vrasjes në rrethana të cilësuara, e mbetur në tentativë, e kryer në bashkëpunim” dhe “Mbajtje pa leje të armëve dhe municioneve luftarake”, të parashikuara nga nenet 79 dh, 22, 25 dhe 278 të Kodit Penal.
