Avokati i ish Ministrit të Brendshëm, Saimir Tahiri, Maks Haxhia, ka thënë se tashmë është vendosur steka, ku çdo funksionar majtas e djathtas do të përfundojë në burg. Ai ka dhënë një deklaratë të fortë, teksa ka qenë i ftuar në emisionin “Të Paekspozuarit”. Gazetari Ylli Rakipi e pyeti avokatin kur tha pas daljes nga gjykata se “politikanët duhet të vishen trashë pas këtij vendimi”, deklaratë e cila u interpretua si një paralajmërim për politikanët. Në kundërpërgjigje, avokati Maks Haxhia tha se mesazhi ishte tejet i qartë.
Pjesë nga biseda në studio:
Ylli Rakipi: Ju thatë që politikanët duhet të vishen trashë këtë dimër. Ç’doni të thoni me këtë?
Maks Haxhia: Mesazhi im ishte i qartë. Për sa kohë u zhvillua një proces i tillë që nuk kishte asnjë bazë ligjore dhe u përmbys çdo gjë në mënyrën më të habitshme dhe anti-ligjore, u vendos steka. Që do të thotë me këtë bazë, me këtë nivel të të provuari, me ketë akuzë, me këtë periudhë 5 vjeçare që z. Tahiri qëndroi në dispozicion të drejtësisë, nonsens juridik, atëherë u vendos steka. Çfarë janë mbi këtë, të gjithë do të shkojnë në burg!
Ylli Rakipi: Pra për hir të Reformës në Drejtësi, trashë duhet të vishen edhe politikanët? Tani duhet të vazhdojë edhe djathtas, sepse u bë edhe Lefter Koka…
Maks Haxhia: Majtas, djathtas, çdo funksionar që ka hedhur firma, mund të gjesh elementet e shpërdorimit minimum!
