Në orët e para të mëngjesit të sotëm, u shemb Teatri Kombëtar, ndërkohë anëtarë të opozitës dhe Aleancës për Teatrin u shoqëruan në ambientet e policisë.
Mes të shoqëruarve ishte edhe kryetarja e LSI-së, Monika Kryemadhi.
Gjatë një deklarate për mediat, ajo theksoi se lutet për paqen e shpirtit të kryeministrit Edi Rama:
“Isha bashkë me ta. Besoj se një pjesë të tyre i kanë shpërndarë nëpër komisariate sipas vendbanimeve.
Bashkë në dhomën e qëndrimit me mua ishte dhe një vajzë, përfitoj nga rasti t’i njoftoj dhe familjarët e saj që është mirë, një vajzë me kaçurrela bjonde, e Lëvizjes Vetëvendosje nga Skrapari ishte. Iu bëj thirrje të gjithë qytetarëve shqiptarë të mos e njohin shtetin e Edi Ramës. Mos të njohin asnjë gjë, që është mbijetesë.
Mos e përdorni fjalën revolucion se na shqetësohen ambasadat, iu duket fjalë e keqe, por harrojnë që këlyshët e komunizmit i kanë aty dhe me ndihmën dhe pazaret e tyre.
Prandaj dua të them që nuk më ngelet gjë tjetër vetëm të lutem për paqen e shpirtit të Edi Ramës se kam përshtypjen që ato themelet e kullave që mendon që do të ngrihen aty do të jenë varri i tij aty do të gjejë dhe fundin e tij.
I bëj thirrje edhe drejtësisë që vazhdon dhe flen gjumë dhe që gënjen.
Të fillojë të na hetojë ne, që kundërshtuam policinë, të fillojë të na arrestojë ne që mbrojtëm Shqiptarinë sepse mesa duket drejtësia shqiptare vazhdon ha dhe pi në ditëlindjet e deputetëve të Partisë Socialiste”.
