Zbardhet identiteti i shqiptarit të ekzekutuar në një restorant në Spanjë. Mediat e huaja bëjnë me dije se viktima është identifikuar si D. Bregu, 42-vjeç nga Lushnja.
Ngjarja e rëndë ka ndodhur mbrëmjen e djeshme, ku shqiptari është vrarë në restorantin ‘The Orange Tree’ në El Albir, teksa po darkonte me bashkëshorten e tij.
Dëshmitarët kanë treguar se një person me kapuç në kokë, hyri në restorant, nxori një armë të vogël, qëlloi disa herë mbi shqiptarin dhe më pas u largua me shpejtësi nga vendngjarja. Shqiptari ndërroi jetë pasi mori 5 plumba në trup.
Pista kryesore e hetimit është larja e hesapeve por ende nuk ka diçka konkrete që e inkriminojnë shqiptarin.
Mediat spanjolle shkruajnë se ky sulm vjen disa ditë pasi anëtarët e një grupi mafioz rus u vunë nën prangat e policisë për pastrim parash, një prej tyre ishte dhe ish-këshilltari i Alteas, Jaime Selles.
Gjatë bastisjeve dhe kërkimeve në Alicante të Madridit, Tarragona dhe Ibiza, policia sekuestroi armë zjarri, 300.000 euro dhe diamante.
Ndërkohë, më 2 dhjetor një tjetër shqiptar, 47-vjeçari Ilir Zelka u qëllua me snajper teksa po hante mëngjes në një restorant, në një prej zonave më të shtrenjta të Brazilit.
