Dje grupi parlamentar i PD-së publikoi për herë të parë kandidatët e përzgjedhur për postin e Presidentit të Republikës. Në mbledhjen e djeshme u propozuan 10 emra, ku spikati edhe emri i Rexhep Ukës. Kandidatët e PD-së zyrtare, për drejtuesin e ri të shtetit shqiptar u përmendën nga 9 deputetë. Propozimet e tyre ishin: Ferdinand Xhaferri sugjeroi Leonard Demin; Flamur Hoxha, Zef Hila dhe Ramadan Lika mbështetën kandidaturën e Arben Çejkut, Bledjon Nallbati u shpreh pro kandidaturës së Dritan Demirajt; Kreshnik Çollaku propozoi 3 emra: Dashamir Shehin, Lajla Përnaskën dhe Jorida Tabakun; Xhelal Mziu sugjeroi emrat e Dashamir Shehit, Rexhep Ukës dhe Halim Kosovës. Propozimi i Princit Leka Zogu II u dha nga Dhurata Çupi. Por lidhur me këto kandidatura, ka edhe kundërshtime. Ish-ministri i Bujqësisë i Partisë Demokratike, Rexhep Uka, ka refuzuar që të bëhet pjesë e garës për President të Shqipërisë, që do të zëvendësojë Ilir Metën.
Në një prononcim për gazetën “Panorama”, pasi u propozua si një nga kandidaturat e PD-së për kryetar shteti, Uka tha se nuk ishte pyetur më parë nga deputeti Mziu. Ish-deputeti i PD-së la të kuptohej se është i zhgënjyer nga politika, dhe nuk mbështet formulën aktuale të zgjedhjes së Presidentit.
Z. Uka, deputeti Xhelal Mziu ju ka propozuar sot në mbledhjen e Grupit të PD-së si kandidat për President të Shqipërisë. Jeni njohur me këtë propozim, si e pritët?
Unë e telefonova dhe e falenderova për vlerësimin. Është mendimi i tij, por propozimi s’ka lidhje me mua. Nuk kam pasur asnjë njoftim, asgjë dhe as nuk jam pyetur.
Nëse propozimi do të formalizohet, do të shkojë në Parlament. Do të ishit i gatshëm ta pranonit?
Jo, jo, jo. E shikoj një përgjegjësi shumë të madhe. Për këtë çështje kam një pikëpamje dhe bëj analiza shumë të thella për gjëra të tilla. Tashti nuk jam më i ri. E njoh mirë situatën. E bluaj, njoh edhe politikën. Ky është fakti që më frenon. Nuk bëhem më si “kau balash”. Jam në fazën kur opinioni publik, njerëzit që më kanë mbështetur, njerëzit që më njohin, atë punë e kam provuar. Kam tentuar dhe i kam thënë të gjitha mendimet e mia në të gjitha epokat. Në një farë mënyre, kam shprehur atë që ndiej, por edhe kam kuptuar se ku gjendem. Dhe hiç nuk ka lidhje me mua kjo. Por gjithsesi e vlerësoj shumë faktin që deputeti më propozoi.
Ju e keni një identikit se si duhet të jetë Presidenti shqiptar?
Pakënaqësitë e mia gjithmonë do nxjerrin një President nga sirtarët. E kemi parë se si shkon kjo punë. Unë e kam deklaruar, kam votuar kundër ndryshimeve kushtetuese. E kam thënë që në këtë katrahurë, populli le ta ketë një përfaqësues të vetin. Presidentët, kandidatët dalin, kemi modele në botë, përplasen me njëri-tjetrin, marrin notat e vërteta. Por jo duke bërë vizatime nëpër sirtarë e nëpër kështu gjëra. Nuk është ky Presidenti që i duhet Shqipërisë.
Ju thoni që Presidenti duhet të zgjidhet nga populli?
Unë kam qenë partizan i kahershëm për këtë punë. Të dalin atje në shesh. Vetëm përpara popullit merret vesh nëse është kallaj apo është bakër, apo çfarë është.
