Prokurori Arjan Ndoja, i cili mbeti i plagosur pas një atentati teksa udhëtonte me makinë ndodhet jashtë rrezikut për jetën. Sipas burimeve të “BalkanWeb”, Ndoja, i cili ka marrë dy plumba, aktualisht ndodhet në sallën e operacioneve në spitalin e Durrësit.
Ndërkaq, Polica e Durrësit njofton se të plagosur kanë mbetur shtetasit me iniciale: A.L., 48 vjeç, A.N., 44 vjeç dhe A.M., 30 vjeç. Ky i fundit është dërguar për mjekim të specializuar në Spitalin e Traumës në Tiranë. Ndërsa dy shtetasit e tjerë ndodhen në Spitalin Rajonal Durrës, jashtë rrezikut për jetën.
Ngjarja është marrë nën hetim nga Prokuroria e Krimeve të Rënda.
“Policia e Durrësit është vënë në ndjekje të autorëve, po krihet zona dhe në të gjitha akset rrugore që lidhen me Durrësin janë ngritur pika kontrolli.
Për zbardhjen e ngjarjes është ngritur menjëherë një grup i posaçëm hetimor nga Departamenti i Policisë Kriminale, Prokuroria e Rrethit Gjyqësor Durrës dhe Drejtoria Vendore e Policisë Durrës.
Policia e Shtetit fton këdo që mund të ofrojë informacion në ndihmë të hetimit të shpejtë të ngjarjes të telefonojë falas në numrin 112”, thuhet në njoftimin e policisë.
