Një emigrant nga Iraku ka humbur jetën, pasi u përpoq ta kalonte ngushticën mes Francës dhe Britanisë së Madhe, përmes notit.
Trupi i emigrantit 48-vjeçar është gjetur afër resortit Zeebrugge, në brigjet e Belgjikës. Sipas mediave të huaja, ai ishte veshur me një jelek të improvizuar me shishe plastike dhe duke mbajtur një çantë të vogël me dokumentet e identifikimit.
“Është hera e parë që kemi gjetur një trup emigranti”, tha Carl Decaluwe, guvernatori i provincës perëndimore, Flanders.
Sipas zyrtarëve, 48-vjeçari vdiq ndërkohë që ishte nisur të notonte nga një plazh në Francën veriore, drejt tokës britanike. Ata mendojnë se rrymat e ujit e kanë dërguar trupin e tij në territorin ujor të Belgjikës.
Sipas një agjencie belge të lajmeve, ai ishte përpjekur të shkonte në Britani përmes notit, pasi i ishte refuzuar kërkesa për azil në Gjermani.
