Gazeta gjermane “Bild” publikoi 16 përgjime nga dosja “184”. Në një nga përgjimet përfshihej dhe emri i ish-deputetit demokrat, Flamur Noka, si kryetari i një grupi prej 50 personash që dhunonin votuesit socialistë.
I ftuar në emisionin “Pyetje nga Babaramo”, Noka u shpreh se: “Këto janë gjëra banale nuk dua të hyj në këtë histori. Informacioni ishte që Arben Keshi nga mëngjesi në darkë trokiste në derë të banorëve për të shpërndarpara me lista. Kush nuk pranonte kërcënohej. Del edhe një gjë tjetër që ata kishin parcelat me kanabis, dhe diheshin që pronarët ishin Arben Keshi dhe Robert Ago.”
Po ashtu, Noka tha më tej se kush nuk pranonte që të shiste votën, kërcënohej, ndërsa shtoi se drejtori i Ministrisë së Brendshme, Arben Keshi lëvizte me thasë me para.
“Ka pasur përplasje nga qytetarët dhe njëri nga ata që merrej me shitblerjen e votës. Incident normal siç ndodhin në datën e zgjedhjeve. Kam qenë dëshmitar i kësaj maskarade 3 muaj. Qarkullonte nga mëngjesi në darkë me thasë me para. Kush nuk pranonte para kërcënohej, prandaj kemi dalë. Dhe ky shefi i komisariatit u gradua pastaj, u ngrit. Ishin të gjithë ushtarë politikë dhe jo punonjës të shtetit”, deklaroi Noka.
