Moderatorja e emisioneve sportive dhe aktorja, Eva Murati, teksa ishte e ftuar këtë pasdite tek “Rudina”, foli për filmin “Unë si ti”, dhe rolin e saj si kujdestare në një jetimore.
Eva theksoi se ky film e kishte prekur shumë, ndërsa e cilësoi si një eksperiencë që i ka ndryshuar jetën në kuptimin e plotë të fjalës, aq sa shprehu dëshirën që në të ardhmen të adoptojë një fëmijë. Një hap i rëndësishëm ky, të cilin po planifikon ta hedhë në jetë.
“Në këtë film unë jam kujdestare e shtëpisë së fëmijës që gjithë kohën përpiqet të japë maksimumin. Eksperienca në shtëpinë e fëmijës në Sarandë ka qenë e jashtëzakonshme. Edhe tani që e kujtoj më rrëqethet mishi. Është një realitet komplet tjetër dhe më kanë bërë të kuptoj se jam me fat për shumë gjëra në jetë. Më ka bërë të mendoj që në të ardhmen të adoptoj një fëmijë. Janë plane për të ardhmen e largët sepse unë vetëm para pak ditësh mbusha 24 vjeç. Fustani i bardhë dhe fëmijët janë goxha larg. Padyshim që do të doja të kisha fëmijët e mi biologjikë. Shpresoj që edhe unë të kem tre fëmijë, si gjyshja dhe mami. Nuk e përjashtoj mundësinë e birësimit sepse kjo eksperiencë ka qenë nga ato që të ndryshojnë jetën”, tha Eva.
Kujtojmë që Eva dhe djali i Jozefina Topallit, Genar Topalli, prej disa kohësh janë përfolur se i kanë dhënë fund lidhjes pas 8 vitesh.
